رد: السفر في الخريف ... من أو إلى أبوجبيهه

شكراً عم شاويش الظريف ؛؛؛؛؛؛؛؛؛؛؛بمرورك بأجمل الكلمات المتنقاه من عملاقة الشعراء السودانين إزدان البوست بهجةً وروعةً

وجــانا الريــد يعلمنا
نعيش الدنيـــا بالإحسـاس
نســــامح بي قليب طيــــــب
نشيل الريـــد في كل النــاس
عرفنا الريـــدة في الطيبــــة
وحلاوة الريدة في الإخـــلاص

والله بوست
ما عادى
تسلم اخى عتمان
والمغفره والرحمه لستاذنا الخالدى

وكل عمرى اخى غريق كنت بحلم انى اعيش فى داخليه
واسافر واستمتع بالمغامرات
دى
وطبعا كثير سمعنا بها من اخواتنا الكبار عند سفرهم
لدراسه
وحقيى مستمتعين معاك ومنتظرين

أولاً أشكر العزيز غريق على هذه السفره التي امتزجت فيها الإلفه وحب الناس و الضبايح و الترحيب الراقي ...سلام جاكم جمين ...... كل المتداخلين في هذا البوست الجميل...... أخي العزيز محمد نويه و العزيزه سهاد ..... الظاهر عمنا عثمان ده تذكر ســفره ..... وهي مازالت معاهو في الذاكره ويبدو أنّ فيها بعض التوهان ...... أنا أناشدك يا عزيزي الغالي عصـــمان أن تــدرج لينا سفره في الذاكره وياليت معــاها .... من الوارد في أهزوجة الخالدي....... وخليني أديك .... يا عزيزنا ...
" آلفني " نظمها الشاعر الطاهر محمد عثمان شاعر عطبرة .. وغنّاها الفنان عبدالعزيز داؤود ...هذه القصيدة نظمها فى يوم شم النسيم .... يوم عطلة خرج من المنزل بدون أن يكون له هدف ، فركب الترام وعندما وصل حدائق المقرن ( ..سابقاً) ،نزل ووجد فتاتين فى انتظار الترام الثاني ......فتاتين غير سابق معرفه.... وكن يعلقن على الأناقة والذوق ....انصرف الشاعر وصديقه وصــادفوا نفس البنات في مكان آخر في بحري جلســوا وتناولوا الباردوالشاي وانصرفوا .... ....وكانت اللقاءات متكرره في نفس اليوم ... وتعلق قلب الشاعر ....غابت الشمس .... وظلت تلك اللحظات ذكرى في الخاطر وخرجت القصيده..................
((عصمان :شوف البراءه .... وشوف الأخلاق ....رغم وجود البنات مع الشاعر وأصدقاءه..إلاّ أنّ المسأله لم تتعدى إلاّ الإحساس الجميل والكلام الرقيق ...إفترق الجميــع ... وظلت الصوره الجميله طلعت قصيده في أسمى صور العفــه))

آلفنى فى البرهة القليلة
وفارقنى ما بين يوم وليلة
صادفنى فى داخل خميلة
هتن الطل سقاها
بعيونو الهميلة
والأوراق تداعب اغصانها وتميلها
وثغر الفجر ضاحك
والزهرة الجميلة
تختال لى انا لازال أخيله
فى ظاهر عيونى
وفى داخل الخميلة
روضة رشح نداها
يفوح طيبه ونجيلة
بى باسمات زهورها
وبىباسقات نخيله
خطرت لى والخاطر يجيله
بين قلبي المعنى
وبين روحى الوجيلة
الصدفة العجيبة
والفرقة العجيلة
والقعدة اللذيذة
فى تلك النجيلة
000000000000

شكرا لكم يا رائعين ويا عصمان شنو هذا الابداع 00هديتك حلوه وهيجة فينا عواطف قديمه زمن الشارلتول والترفيلا 0000طربنا للخالدى كثيرا ورقصنى ونحن فى عز الشباب التحيه لك ايها الرجل الشهم ابوعلياء وعبرك نحيى الشاب المتالق الفاتح الذى يحمل روح شابه متالقه لا يبخل بما تجود به ودائما هو فى القمه وتحاياى الى سهاد وول نويه وطبعا هذا البوست دفعنا الى احيائه المتالق الفاتح واتمنى ان يزعفنا اخرون برحل خريفيه اخرى لان رحلتى باقى ليها تلاته حلقات بس

تحياتى لكم

تحركنا صوب جبل الضباب وكان اليوم صاحى ليس به نزر مطر ودخلنا الى منطقت المشاريع ووجدنا الخويرات الفى الطين كلها لينه وعبرناها واحد تلو الاخر وطبعا بعد مرازه ودفير وردم ووحل متكرر ونحن بالقرب من التقاطع(طبعا التقاطع ده هو تقاطع شارع الهوى الجاى من كرتالا مع الجاى من ابوكرشولا)والتقاطع بالغرب من سدره حوالى خمسه او سته كيلو 000000فى حفير هناك والمجرى المغزى للحفير تم حفره بواسطة الاهالى وهذا الحفر اثر اثر كبير على الشارع وعمل خور ومافى اى طريقه لنتفاداه وقوم يا سواق تلب بالفارقو فى المجرى والعربيه وحلت والكوكرت كوكيره ماكنه 00وطبعا ده خلا المساعديه يسبو سب ما عادى 000ياخى ما قولنا ليك خلى ننضف ليها 00وكلك كتم ساى والشمس كانت عصر والناس جيعانه والعربيه وحلانه وبطلت ودى ذادت الطين بله 000مشيت انا والمرحوم شيخ الدين الى واحد بتاع تركرك قاعد يحرت ليه فى زراعه ووصلناه وشيخ الدين فاوضو على جر العربه وقال ماعندو قطره وجا معانا وبقينا على الحبل بتاع العربيه يقطرها بيه 00والحبل ضعيف ومافى طريقه إلا ننزل العفش للتخفيف والعربيه كمان مبطله وتوكلنا على الله انا وابو كليقه وبدأنا ننزل فى العفش شيى شنط وصفائح مقرون مليانه وريحة الكعك طاقه منها وانحنا مصارينا بتسوى جووووق من الجوع وشامين العربيه كلها ريحتها خبيز وطبعا المقارين التقيله دى مقفله بالطبل المسوكره ومؤمنه حتى لوعاوز تسرق ليك كعكايه ما تقدر تدخل يدك !!!!!!!!!!انا وكلك نزلنا العفش وتحت دعوات الحضور والبنيات وشى نديه (يا ابوشمله000يا الشيخ مختار)هب العربيه مرقت ودورت وانا وابوكليقه اضربنا من رفع العفش والدور الجاى قال كل واحد ارفع عفشو يا جماعه 000شيخ الدين صاح فى كلك يا محمود ماترفعوا العفش ده خلونا نمشيى الشمس دى ما قابت علينا ؟؟؟؟؟؟؟رد عليه ابوكليقه انا يا معلم ريحت الكعك دى قعدت تسوى لى طمام والمقارين دى كلها مليانه كعك انا برفع الشنط وبس واى زول يرفع كعكو هو!!!!والدور الجاى ضحك ضحك شديد وقال لمحمود ابوكليقه هو يا كلك انت ما احسن تشم كعك مش اخير من ريحه زاتو ما تلقى000وطبعا انتقلة عدوى الضحك للجميع 000والغريبه لم تجود واحده من اخواتنا بكعكه واحده على ابوكليقه وهذا الكعك كنا نشم ريحتو ولم نره ولم نتزوق طعمه ونحن نعانى من جوع كافر طوال الرحله!!!!!!!!!!!!

بعد المغرب وصلنا الى سدره وبالقرب من السوق توقفت العربه وتجمهر الناس حولنا ليعرفوا هذه العربه جات من وين وعندما نقول ابوجبيهه تسمع لا اله دليل تعجب؟؟؟؟؟؟؟؟؟؟؟؟؟انا وكلك جلبنا العناقريب والسباتات من اهلنا الطيبين فى سوق سدره وبإقتراح من عمنا حاج خالد زهبنا وبحثنا عن تيس وبعد قليل وجدناه واتفقنا مع بتاع مطعم ان يمدنا بالعده وبعد لحظات التيس كان لحم فى الصيجان وتعشينا لحم ودقيق استرالى وطبعا هذه الاكله تبخنها بنات ابونواره وهى تسمى عندنا فى بادية اولادحميد بالعجكو هى عباره عن لحم يتبخ وبعد ان يستوى ياتى بعجين الدقيق الفينى ويقطع لقطع صغيره ويرمى على طبيخ اللحم وهو لا يذال فى النار ويترك حتى ينضج الخليط ويسبك ويكب على الصحان الكبيره ويقدم هكذا ويسمى العجكو او تكارو عند البعض وبعد العشا نمنا فى سدره ليله هادئه على امل ان نواصل غدا الى الرهد ابو دكنه00

نواصل

الراقي الزعيم غريق انشاء الله تسلم وجمعة مباركة
السرد جميل وممتع والقصة حلوة بالحيل..............
حقيقة الجوووووووع كافر والبنيات ديل عاد مابسعلن كلو كلو مالن كان مرقن الكعك
خلنكم تشموا في ريحتوا سااااااااي
بس البركة في التيس الفي الصحانة
يديك العافية

تحيــاتي الغاليه..... وأنت تتحفنــا بهذه السفرات واليوم وصلنا جبل الضباب استمتعنا بالدفرات والعاجكو صراحة .....جوعتــنا...
غريق لك التحيه وانت تكمل لنا الرحله ولكن بعد التلاته حلقات بننتظر منك سفره تانيه...... واخونا عثمان حيدخل معاك ..... باك يمين وإنت في السنتر تحكر وأحكي لينا وكلنا آذان صاغيه.....
شكراً......

[[00والحبل ضعيف ومافى طريقه إلا ننزل العفش للتخفيف والعربيه كمان مبطله وتوكلنا على الله انا وابو كليقه وبدأنا ننزل فى العفش شيى شنط وصفائح مقرون مليانه وريحة الكعك طاقه منها وانحنا مصارينا بتسوى جووووق من الجوع وشامين العربيه كلها ريحتها خبيز وطبعا المقارين التقيله دى مقفله بالطبل المسوكره ومؤمنه حتى لوعاوز تسرق ليك كعكايه ما تقدر تدخل يدك !!!!!!!!!!]]
ما هذا الذوووق ...ما هذا الصدق وهذه الروعة أيها الشفيف الظريف ...شكراً لك أخي غريق على هذا السرد الممتع وهذا الإبداع ...صدقني لقد أنعشت هذا البوست ..ولكالتحية ...
ولك محبتي ...

صباح والفاتح وعصمان00اشكركو على هذا المرور الجميل وسنواصل إن شاء الله

شكراً غريق علي مواصلتك في السرد الجميل عن هذه الرحلة المليئة بالطرائف التي قد تظل خالده في ذاكرتك
وأنا ايقنت إنو بعد جبل الضُباب ماحتواجهكم أي صعاب تاني مع الفارقو ؛لكن الحصل ليكم أخيرمِنّو بتاعت رشاد ...بس رحلة حلوة بجد ..لكن الأخوات ماإتظرفن معاكم ؛ويبدو ليّ جوع الداخليه الحار داك خلاهن يبخلن عليكو بكعكن دا؛لكن عوضنكم بالعجكو دا بعشاهن الكااااارب دا
بعدا طبعاً حتخشوا القيزان وأعتقد الصعاب التي تواجهكم هي وحل الرمال وكدا ...

صحونا مبكرين على امل ان نصل الرهد ابو دكنه بدرى 00 00تحركنا والفارقو ماشى كويس حتى وصلنا ابو حبل وشالت مطره وبدأة تنقط فينا وسبحان الله ربنا حفظنا من المطر طوال الرحله إلا هذه المطره وقطعنا الخور ابوجنازير وصعدنا الردميه بتاعت الترده وهى طبعا طينيه واصبح الفارقو يتزلق يمين وشمال وشيى دعوات وشيى نديهه وما خلينا ابو شمله والشيخ مختار وبعد معاناه شديده وخوف من المزلقانات شديد خرجنا بالقرب من السكه حديد وكلك قال للبنات يلا زغرتن خلاس دخلنا القوز 00000000والبنات عملن طناش وقام قال ليهن انحنا ما قلنا ليكن زغردن اصلو قلنا ادونا كعك 00والعربيه قررررررر ضحكت وطلعنا القوز ووقفنا فى الموقف جوار الجامع وانا حملت شنطتى وتوجهة الى اللكونده وباقى الناس حتواصل بالفارقو الى الابيض وودعت اخواتى واهل العربيه وكان مقرى فى اللكونده دخلت اللكونده وطبعا دى اول مره اشوف فيها لكونده وكنت بسمع من عمنا عبدالرحمن ادم رحمه الله كلمت لكونده كلما سافر الى الابيض والرهد وكانت كلمة لكونده كلمه كبيره والذى يستخدمها فى حديثه هو زول مفتح وشاف الدنيا واللكوندات 00دخلت وسألت واحد من النزلاء عن صاحب اللكونده وقال لى امشى الاستقبال ؟؟؟؟؟لم افهم قصده لاننى لاول مره اسمع كلمة الاستقبال !!!!سألت آخر وقلت ليه انا عاوز انزل فى اللكونده اعمل شنو دلنى على غرفه ذهبت وعملت إجراءآت النزول ودخلت الحمام واستحممة من وسخ السفر وغيرت هدومى وتريحت كويس وخرجت على السوق لزوم الاكل وكده 000وانا خارج من اللكونده التقيت الفاتح عبد العظيم لم اصدق عيونى سلمت عليه بحراره وسلم على بحراره اشد وقعدنا فى مطعم واتونسنا وعلمت انه مسافر الى الخرطوم لعمل امتحان المعادله فى القانون وعرفت منه ان قطر نيالا ياتى غدا بعد الفطور 00نصحونا ان لا نقطع تزاكر بل نسطح فى القطر ملح إلا ان الفاتح كانت معه تزكره درجه اولى وانا فضلت التسطيح على الاقل هذه اول مره اشوف فيها قطر وكمان اسطح واركب بلاش 000فى الصباح وحوالى الساعه 10 صباحا سمعنا صافرت القطر وبدأ الناس يتجمهرا فى المحطه وكنا والفاتح من ضمن المنتظرين ووصل قطر نيالا وتدافع الناس نحو الابواب والشبابيك والقطر مليان فوق وتحت ومافيه نفس اصبنا باحباط كبير وفى الزحمه افترقنا مع الفاتح الذى ذهب ليبحث عن عربه درجه اولى وكان طموحى ان اجد مكان يسعنى فى سطح القطر وتحرك القطر وتدافعنا نحو السطح وركبت وجلست وشنطتى (رحله سعيده)هذه العباره كانت مكتوبه على الشنطه000فى يدى وتحرك القطار وسمعنا صوت العجلات 00دقدق0دقدق دقدق00وكان صوت ممتع واتجه بنا القطر الى الشرق

غدا ننهى الرحله مع معاناه جديده مع القطر

أيها الغريق ......
فعلاً "في الأسفار خمس فوائد "
رحله معرفيه حقيقه وخاه عندما نزلت في اللكوندا وطبعاً كلنا تجاربنا بتتشابه في حتة اللكوندا و القطر..... لكن عجبتي حكاية الشنطة " سفره سعيده وجنبها طيّاره مرسومه ".....الفاتح بفتش عن الدرجه الأولى وإنتا عايز تجرب القطار .... وطبعاً تلك الآله الإسمها القطر ليها حضور عند الشعراء في فترة الستينات و السبعينات ... ذرفت دموع ونظمت كلمات ...
فيها ثناء....
" يا قطار الشوق متين ترحل تودينا .....
نزور بلدا حنان اهلا ترسي هناك ترسينا"
----
" القطار المرّا ..فيهو مّرا حبيبي "
----
وبعضها عداء
" القطر الشالك إنتا ..يتكسر حته حته "
----
" القطار فرقنا....ليه القطار فرقنا
أه حزنا ملكنا.....بي انتصار روحنا
.....برانا نحنا برعنا"..
----
"من بف نفسك يا القطار.
ولهيب نارك.
قلبى طار..
وين الحبيب.
انت شلتو..
جيبو..يا القطار.."
وصراحه التسطيح في القطر عندو نكهه خاصه وبالذات عند الغروب و الشروق ...أمتعتنا ... ويقيني أن للسفر رائحه وطعم ولون ...... سلام عليك ياغريق ..... ومنتظرين

شكرا يا الفاتح وطبعا السفره دى كانت اول سفر لى خارج الحباك قبلها كان حدى رشاد والعباسيه وديل زاتهن شفتهن فى المسار الناس بيجو سايرين ويوم السوق نمشى سوق رشاد او سوق العباسيه وطبعا انا فى هذه الرحله داير اشوف الخرتوم اول مره 000وطبعا القطر بلفلف بى سنار ومدنى ومحطاته الكثيره والحراميه ومقاطيع ربك وكده خلى بكره نكمل لك التحيه يا الفاتح يا نبيل

تسلم يا غريق ... أحلي شئ فيك ... صدقك ...وعفويتك ...والبساطة التي تتمتع بها ودون تكلف ...وننتظر بفارغ الصبر ...بقية السفرة والتي أمتعتنا بها معك ...محبتي

شكراً يازعيم علي السرد الجميل الذي يجسد اصالت اهلنا في الريف ...
وقلت لي كلمة استقبال ودرتك ...وكان قال ليك بالانجليزي ...كان المشكلة قامت ...
وننتظر نهاية الرحلة مع القطر ...

وصل بنا قطر نيالا السميح كاول محطه بعد الرهد والشمش كانت حاره والدنيا سخانه وراكبين طبعا سطح 000وقفت فى السطح ونظرت الى الوراء والى الامام القطر مدهش وشايل كميه من البشر لم ارى لها نظير فى حياتى !!!!وكنت مندهش غاية الاندهاش من هذه الاله العجيبه وبعد السنده فى السميح صفر القطر وتحرك الى المحطه التاليه امروابه وبها ايضا اخز القطر وقفه اطول ؟؟؟؟وكانت هذه المحطات بها سوق جيده والقطر حضوره يمثل مناسبه تهم كل اهل المحطه وهو يمثل وسيله سفر سريعه ورخيصه 00سار بنا قطار الشوق من محطه الى اخرى حتى وصلنا كوستى حوالى الساعه 8 مساء 0000لم اصلى الضهر والعصر والمغرب طوال الوقت كنت راكب فى السطح !!!!!طلع البوليس الى السطح وبدأ يضرب فى الناس وينزلهم بالقوه من السطح وتم اجلاء جميع الركاب من سطح القطر واستقليت هذه الفرصه وتيممت سريع وصليت جزء من الصلواة التى فاتت وانا بصلى بدا القطر يتحرك ببط وبدأ التدافع الى السطح وبعد مجهود استطعت ان اصل الى السطح وقمت وقفت على طولى وصاح فى رجل بجانبى اجلس الكبرى بيقطع راسك وبسرعه جلست بعد ان جزبنى الرجل الى الجلوس جزبا وهو يتشهد ويردد داير تموت ان ما عارف الكبرى ونظرت الى اعلى اذ بالكبرى يقطى سماء السطح وحمدت الله على نجاتى بفضل هذا الرجل الطيب وبعد دقائق توقف القطار فى ربك (نعلم بهذه المحطات من الركاب)وبعدها دخلنا اتجاه سنار والدنيا ليل وانا لم اجد الى النوم سبيل 000وسار بنا القطار حتى خيوط الفجر الاولى ونحن فى الجزيره عرفتها من الخضره وكانت رائعه ونحن من على السطح نرى الشمس تنثر اشعتها على الحقول المتراميه على مد البصر ونرى المزارعين يتحركون بدوابهم بخفه ونشاط ليبدؤ يومهم العملى 00وصلنا ود مدنى الساعه 7صباحا وكنت قد بلغ بى النعاس مبلغ وعندما علمت انها مدنى اخزت شنطتى رحله سعيده ونزلت وودعت القطار لعلمى ان مدنى الخرطوم فيها طريق ظلط مسفلت لذا من الضرورى ان تكون هناك مواصلات مريحه !!!!!!!!!!!!!!!!!!

سألت واحد من الماره من موقف بصات الخرطوم فاشار لى على كشك ليس ببعيد وقصدته ووجدت صف من البشر ومحل مكتوب عليه مواصلات الجزيره وهناك بص مكتوب عليه نفس الاسم ووقفت فى الصف وسألت الذى امامى (دى مواصلات الخرطوم )رد على بخبث دى مواصلات الجزيره 000قلت له اعنى هذه البصات ماشه الخرطوم قال لى نعم ووقفت وراه وانا واقف جات بنت جميله وقالت لى لو سمحت ممكن تقطع لينا تزاكر معاك !!!!!!وانا ركبى لمن رجفن من نعومت صوتها قلت لها نعم بلحيل ناولتنى ورقه ام عشره جنيه وقالت لى جيب لينا تلاته تزكره 00وبعد شويه وصلت الى بتاع التزاكر واعطيته 15جنيه وقلت له ادينى اربعه تزاكر 000سلمنى تزاكر 42-43-44-45وخرجت الى البنيات وسلمتهن التذاكر ودخلنا البص وتحرك بنا صوب العاصمه وبعد دقائق غلبنى النعاس ونمت وصحيت على لكذات من جارى ان اصحى 00وهنا حصل موقف نبيل قامت البنت الكبرى واسمها سلمى وبدلتنى فى الكرسى لكى اكون فى نهاية الكنبه وافسحت لى قليلا وقالت لى كده ممكن تنوم مرتاح وسالتنى من وين جيت وشرحت لها اننى مساهر فى القطر وبعدها تركتنى انام 0000صحوت على صوت سلمى وبهزه خفيفه فى كتفى والبص فاضى من الركاب وكانت تحمل فى يدها سندى وش وبيبسى وقالت لى هاك افطر ومافى داعى تنزل افطر واخد راحتك سالتها نحن وين قالت لى وصلنا الكاملين 000وبعد الفطور والببسيى الذى اشربه اول مره 00تحركنا صوب العاصمه ولم انم تانى وبدأت اتحدث مع البنيات وتعرفنا على بعض وحكيت لهن عن رحلت الفارقو حتى وصلنا السوق الشعبى 0000هذه اول مره ارى فيها الخرطوم وكانت سلمى لطيفه معى واصرت ان امشى معهم البيت وارتاح وبعد داك امشى الى اهلى وكنت احمل عنوان حسن خالد البشير وهو كالأتى 000مديرية الخرطوم 00مكتب تجميل وتنمية العاصمه000هذا هو عنوان حسن ظليت احفظه على ظهر قلب منذ ذاك الزمن البعيد 0000بعد انتظار مع سلمى واخواتها الى بضع دقائق وطبعا هن بنات عصريات جايات من مدنى والتسريحه كيف وشايلات شنط دبلماسيه وانا ريفى قح لا احسن حتى الحديث 000توقفت امامنا عربيه بيضاء سمحه سماح لم اشاهد مثلها فى حياتى فى ذاك الزمن (علمت فيما بعد انها بيجو فور او فور)ركبنا وركبت قدام مع السواق شفت كرم سلمى دى كيف وتحرك بنا البيجو الى منزل والدهم فى المقرن 000نزلنا وانا طبعا مندهش وما قادر اعمل اى حاجه جانى السواق بعد ان دخلت فى الصالون ودلنى على الحمام 000لم اعرف استخدام الحمام الصحيح إلا بعد عدت تجارب عرفت ان هنا مكان الجلوس وهنا الاستحمام 000جانى الغداء مبكر واكلت لوحدى اكل لزيز وبعد الاكل نمت 000صحوت ووجدت الدنيا بقت ليل 000وبعد ان صليت المغرب والعشاء جاء والد البنات وصاحب البيت وتعرف على وقال لى انا كنت زرت مناطقكم دى وانا موظف صغير وكان عملنا حفائر هناك فى السهل وابونواره وجديد وصلحنا الخور 00ووجدته يعلم الكثير عن المنطقه ويعرف المرحوم حاج مختار ابونخيله والكثير من تجار ابوجبيهه وعرفت ان اسمه على ابراهيم وهو من مدنى اصلا وبعد ونسه مع المرحوم على ابراهيم والد البنات 00دعانى الى مشاهدت النشره فى التلفزيون 000طبعا انبهرت بهذا الذى ياتى بانسان كامل يتحدث 000انه التلفاز كما كان يقول لنا استازنا عصام عليه رحمة الله 000صحوت مبكرا وشربت الشاى وجاءت سلمى وسهام وهند ووالدتهم حاجه حليمه 00وودعتهم على امل ان ازورهم مره تانيه وركبت فى البيجو الى مكتب حسن ووجدت حسن جالس فى شباك الايصالات وخرج وسلم على سلام حار واستأذن وذهبنا سويا الى امدرمان شارع مدنى حيث بيت العزابه من ابناء جلدتى وكان اليوم خميس ومنذ العصر بدا الشباب يتوافدون الى بيت العزابه وكانت المفاجأة عندما رانى شقيقى الصادق الذى كان وقتها يدرس فى الاسلاميه ولم يتوقع حضورى البته وكان حضورى مفاجاه له 0000!!!!!!!!!!!!!!!!!!!بعد اسبوع اصطحبت من يدلنى على المقرن وذهبت لزيارة اسرة حاج على ابراهيم والتقيت بسلمى واخواتها 000وظليت على صله بهذه الاسره حتى الان فسلمى تزوجت وسكنت بحرى الصافيه وسهام توفيت فى حادث حركه فى طريق مدنى بعد زواجها بشهر واحد وهند اصبحت دكتورة اسنان وتزوجت وسكنت مدنى آخر مره هاتفت سلمى يوم الجمعه الماضى دعتنى الى زواج بنتها دعد0000000

نلتقى فى رحله اخرى من رحل الحباكين

بس اقول ليك شنو ....ذوووق فات الحد ...سرد قمة في الإبداع ...جكس قمة في اللطافة ... بس أوعه تفوت الحفل ...شكراً كتير أخي غريق الواضح الصريح ...تصدق كبرت في نظري أكبر وأكتر ...ولك محبتي أيها الشفيف اللطيف ...

الرعيم .. حكاوي ممتعة وسرد مشّوق و قصص لا تنتهي

لالالاوالله العظيم
ده ابداع ما عادى
اخى غريق
والله ضحكت ضحك شديد
ربنا يديك العافيه يا رب
اها جماعتك ديل قول ليهم اخياتى دايرات يحضرن
زواج دعد ده ...
وعقبال نحضر زواج اولادك وبناتك
تحياتى لهم

اشكركم يا رايعين يا ابو علياء وابو الزهور والرائعه سهاد اشكركم كتييييييييير على مروركم الرائع000وكده نشوف حكايات اخرى خريفيه من رائع آخر منتظرين

شكراً غريق قمة الروعة في السرد والبساطة التي تكتب بها خالية من أي تكلف أو تقعّر ؛والله أستمتعة معاك كيف! لأني بحب البساطة
حقيقةً كانت قصة جميلة في محواها كثيرمن الطرائف والمواقف النبيلة التي تدل علي أصالة الإنسان السوداني وكرمه المعروف به ؛حقيقة قصة ؛كانت ماليها نهاية والدليل علي ذلك مازلت مواصل مع خيوط تلك الرحلة؛وكمان شفنا النقلة العجيبة من معافرة الفارقو الي البيجو في شوارع المقرن وكدا
ومشكور ياعم شاويش علي مداخلتك البريئة الجميلة دائماً بتزيد الحلاوة سكر ؛طبعاً في اسم هنا اتغيِّر الي "لقويّة"
تحياتي لكما‘‘‘‘‘‘‘‘‘‘‘‘‘‘‘‘‘‘‘

التحيه ليك يا ول نويه وشكرا على الثناء

عووووووووووووووووووووووووووووووووووووووك

يا جماعة حصونى انا وحلان فى ديبكر

طيب كويس

لابد من رفع هذا العمل الابداعى يا شباب

غاية المتعة

وين الزعيم و الفاتح و عمو عصمان

يا غالي شكراً للذوق عالي الجوده.... ورفع البوست ....
عثمان خالد كتب " إلي مسافرة "
وغرد سليمان عبد الجليل برائعته ( حليل الراحو خلو الريح تنوح فوق النخل ) في وداع حلفا القديمة
ثلث حمد الريح ( بحمام الوادي يا راحل)
أما بلبل الغرب صديق عباس فصدح ( يا مسافر بعيد راح فات الحبايب )
وابن الشرق الحلنقي شدا للعصافير المسافرة ( هجرة عصافير الخريف )
و إسماعيل حسن" ويقال صديقه وصفيه الشريف حسين الهندي" بكي مع هجرة طير الرهو (والله يا طير الرهو قسما عديل ما فوقو لو )
هذا المسافر إما أن يسافر قسرا ( إنا ما داير السفر لكن بس حكم القدر )
أو ..( لو تسافر دون رضانا نحن نشقي العمر كلو)
أما السفر الخطير يافيصل ...... البشيل معاهو النيل!!!
شيلاهو وين النيل معاك ...
عصفورة جناحتها النجوم وأنا بي وراك
أسأل عليك مدن مدن ، وأعصر سلافة الليل حزن ...
بسال عليك في المنفى في مرسى السفن ...
يمكن طيوفك أخريات الليل تمر ...
تملى ( تملأ) البراحات للحزين طول العمر ....
ما دروبنا وراك ... زادت ودار
يوماتي منتظره الرجوع من الصباح حتى العصر

منتظرين آخر المغــادرين " ول نوية "
سافر مننا رشــاش...

لقد تصفحت هذا البوست الرائع ...بالجد بوست رائع أخي فيصل ...ومليئ بالذكريات الحلوة الجميلة ...ونأمل من الإخوة المواصلة فيه ...وللذكريات شجون ...وتفضلوا بقبول محبتي ...

تعال معاى نشوف مدنى النخلى قال شنو فى السفر دا

علمى عيونى السفر
ما البسافر فى عيونك
سكتو بتبقى السلامة
ينسى أحزانو .
ويعرف الدنيا جنبك إبتسامة
ظللى الناس بى حنانك
أبقى ليهم ضل غمامة
*********
الشقا اللاّزمنى .. مدة
يوم بفوت .. والفرحة تبدا
ما بقول .. فارقنى عدّى
عشان بخاف ترحل عيونك
وتنهزم فينى الأمانى
وبى شقاهو .. وبى أساهو
تانى يتوشـّح زمانى
أصلو غير عينيك .. وحاتك
مافى للأفراح .. معانى
********
جينا ليك شوق فى عيونـّا
وفى عيونك شوق يناغِم
الشجون باكر بترحل
والزمن يصفا .. ويسالم
والحلم يصبح حقيقة
وتنسجم فى الحب ظروفو
والحنين تزهر غصونو
والعشم .. دانيات قطوفو
شوفى كيف يوم بكرة .. عامِر
هاتى إيدك .. شان نطوفو

من طرف احمد مرحوم 19th يونيو 2011, 11:22

يقول المولي عزوجل (كل نفس ذائقة الموت) بقلوب مملؤة بالحزن و الأسي رحلت عن دنيانا الأخت العزيزة عائشة عبد الكريم جاد السيد الكريكواني يوم الجمعة إثر تناولها صبغة بالخطأ كانت تحسبها جرتكا . أسال العلي القدير أن يتغمدها بواسع رحمته وأن يسكنها فسيح الجنات بصحبة سيد المرسلين وإمام المهتدين علية أفضل الصلاة و السلام العزاء موصول إلي االإخوة أزهري بأبوجبيهة الأستذ كمال بابوجبيهة اللإخوات إيمان وإحسان بأبوجبيهة محاسن بأبوجبيهة الأخ مبارك بالخرطوم بحري الأخ جاد السيد بمدني السوق وكذلك العزاء موصول إلي زوجها عبد اللطيف عبد الرحيشم داردوقبابوجبيهة و اسرة داردوق بالموريب

كعب بن زهير مبدع قصيدة بانت سعــاد ... قالها امام الرسول الكريم عليه الصلاة والسلام …فنزع بردته (بأبي وأمي يا حبيبي يارسول الله ) واعطاها كعب أبن زهير, وقد سميت قصيدة ( البردة) وفيها ...
كُلُ اِبنِ أُنثى وَإِن طالَت سَلامَتُهُ ........... يَوماً عَلى آلَةٍ حَدباءَ مَحمولُ .
وقال عليه الصلاة والسلام: " كتب الله مقادير الخلائق قبل أن يخلق السماوات والأرض بخمسين ألف سنة"(رواه مسلم)
نعم تعددت الأسباب و الموت واحد.... وهو سبيل كل حي، وأن الجميع مصيرهم إليه. قال تعالى: كُلُّ نَفْسٍ ذَائِقَةُ الْمَوْتِ ]العنكبوت:] وقال: كُلُّ مَنْ عَلَيْهَا فَانٍ (26)وَيَبْقَى وَجْهُ رَبِّكَ ذُو الْجَلَالِ وَالْإِكْرَامِ ]الرحمن:27،26] فكل مخلوق على وجه البسيطة سوف يموت. قال الشاعر:
وما الناس إلا هالك وابن هالك *** وذو نسب في الهالكين عريق...
لأنفسنا ولأخي عبداللطيف عبدالرحيم أبوزيد نقول ..أن هذه الحياة معبر وطريق إلى الآخرة، وأن الجميع مسافرون إليها. وسيستقرون هناك، وحينئذ يجتمع المسلم بحبيبه وقريبه في الجنة في نعيم دائم، وحياة أبدية فسل نفسك وعللها بقرب اللقاء، فالموعد هناك إن شاء الله تعالى، قال بعضهم - وقد مات ابن له:
وهون ما ألقى من الوجد أنني *** أجاوره في داره اليوم أو غدا
وعلينا أن نتذكر أخي عبد اللطيف أن ابن آدم وأهله وماله في الدنيا ملك لله عز وجل، فله ما أخذ، وله ما أعطى، وكل شيء عنده بأجل مسمى، قال لبيد:
وما المال والأهلون إلا ودائع *** ولا بد يوماً أن ترد الودائع.
أخي أحمد مرحوم ... الوالد بلغني بأن الخبر جاهم من أخت الوالدة الأستاذة /محاسن ادم محمد كباشي وزوجها الأستاذ/أبوعاقلة محمد أحمد كباشي ( يعملان بثانوية الموريب) وبالمناسبة الكريكواني خال الأستاذ أبوعاقلة " شفتا الشربكة دي كيف ؟؟؟" ...
أسأل الله أن يصبر أخونا عبداللطيف ....وأن ينزل شآبيب الرحمة وينور و يفسح لها قبرها ، وأن يدخلها برحمته فسيح جناته، إنه سميع مجيب.
أشكرك أحمد ....

السفر في الخريف ... من أو إلى أبوجبيهه - صفحة 3 1w

يا شباب غريق شاويش ابو الزهور كباشي ود التوم البوست في غاية الروعة والابداع نرجو منكم مواصلة السرد والحكي وهذه الصورة بمثابة تذكير وتنشيط للذاكرة
تحياتي

شكراً محمود يامبدع ... لقد عطرت البوست بهذه البصمات الجميلة ... وسفر الخريف الشيق ...بمافيه من معاناة ومتعة لا تنسي وطرائف وطفشات جميلة وحكايات وحكاوي رائعة ، وبما فيها من عبر ودروس للزمن ... تسلم... وتفضل بقبول إحترامي ،،،

شكــــــــــــراً علي أتحفتونا به من صور رائعة وسرد جميل
لقد أرتحلنا معكم في تلك الأسفار الجميلة رغم معانات المسافرين فيها.. لكنها لحظات جميله ..بس وصيتنا للمعلم ده يعمل حسابو لــ(الحلّة)دي مايضربا لأنها مهمة جداً في في السفر دا

ول نوية : ((وصيتنا للمعلم ده يعمل حسابو لــ(الحلّة)دي مايضربا لأنها مهمة جداً في في السفر دا))...
كلامك دائماً ظريف وحنين ... وتعرف يا نوية معظم المساعدية حينما توحل العربية تجد أنه لا يمتلك أواني لشطف الماء معظمهم يستخدم أواني الطيخ الصحانة الكبيرة والحلل وغيرها ... وتجد المساعد يعمل بكل إخلاص وغرقان بملاسه كلها في الوحل الربوب والطين وتجده حافي القدمين !!!؟ ...وكل همه أن تخرج العربية ... ما هذا الإخلاص !!؟؟

يا ابو علياء دى كان زمان الان المساعديه بقو حناكيش 000المساعد تلقاهو شايل الموبايل ومشقل الاغانى والسماعات فى اضنينو واخر حنكشه

والله ضحكتني شديد ... شكراً يا زعيم ... معزتي ،،،

الحِتة دي كان ماأخاف الكضب ..إنتا طالع من تاندك ذي كيلو كده..لأنو أذكر مرة وحلّنا فيها كيف وحصلت فيها شكلة حامية الوطيس بين السواق والمساعدية بحجة إنو المساعدية نسو(الكُتلة)بتاعت العربية في أبوندكينة

عمو عصمان عجبتك حكاية المساعد ..... بتاعة الزعيم غريق .....
وبيني وبينك كلامو صـــاح ديل بتاعين " تيك أوي و همبرجر ... وحاجات زي كده ......
حليل زمن مساعد الحلة و المساعد الطبي .... ومساعد الياي ....
هل تصدق التلاتة حاجات دي ماموجوده الأيام دي ؟؟؟؟؟

ول نوية ..... شقيش قول لي يا مـــروح !!!!!!!!!! السفر في الخريف ... من أو إلى أبوجبيهه - صفحة 3 Img_1267549804_293

ما هذا الجماااال ... ما هذا الحيـــــاء !!!؟؟ حياء طبيعي . تسلم يا توحة ... معزتي

هذا السرد الرائع لأخي كباشي النور ...في سفر خريف أبوجبيهة ......

طبعاً أبو جبيهة لا فيها سينما ولا تلفزيون ولا كلام من النوع دا. كنا مسطحين خالص .. أها ونحن بالقرب من الموريب العربية وحلت وحلة تمام. خلينا المساعدين بيحفروا ونحنا نقلنا حطب وتراب قنطور ناشف وراجينهم يكملوا الحفر عشان نردم التراب والحطب حتى تخرج العربية.
قلنا أحسن نعمل تمثيلية ونتقمص شخصيات الممثلين المصريين. كل واحد فينا إختار ليهو ممثل ليقوم بدوره. واحد مننا ( مش قلت ليكم مسحطين) قال هو حيقوم بدور شويكار !! ضحكنا قلنا ليهو يا فلان ليه تقوم بدور شويكار؟ قال دا ممثل كويس وعاجبني! قلنا له دا ما راجل دي مرا اسمها شويكار.. طبعاً عمكم أكثر تفتيحة من الباقين أنا بتاع أم درمان. ضحكنا حتى ادمعنا. قال والله ياجماعة المرا دي الوقت دا كلو قايلها راجل.
في سفرية راجعين أبو جبيهة خريف الجامعة قفلت بسبب نميري. من تجملا وصلنا حلة أرمياو في 3 أيام .. كنا جيعانين جوع شديد وماشين كداري. الجماعة قالوا نخرِّم طوالي الناس ديل مساكين وما عندهم حاجة والدنيا خريف. قلت ليهم يا جماعة دي حلة أرمياو والزول دا أنا بعرفه كريم كرم لمن غلط وعنده الشئ ما نحرمه من الأجر وكمان المسافة بعيدة لسع.
نزلنا جابوا لينا الموية والشاي وبعد شوية جابوا لينا رُز مفلفل في الطشادة - صدقوني ليست صحون أو صواني إنما طشادة مليئة بالرز البوخو يلوي.. أكلنا (راجل كلدماي) دي دايرة ترجمة لمن ترجعوا أبو جبيهة أسألوا أصحابكم من عيال أولاد حميد والحوازمة. وفضلنا الأرز في مكانه ما كمّلنا نص الكمية. دعونا للرجل بالصحة والعافية والرزق الحلال. أدعوا له من فضلكم فهو رجل ولا ككل الرجال. هذا الأرمياو يمكنني أن أقسم أن ماله حلال بنسبة 110%. كان يعمل عتالي في لواري المنقة. بدأ بشحن 5 كراتين في اللوري مجاناً. زادت الكمية لعشرة كراتين ومنها إلى 50 كرتونة بالأجرة. وبعدها 100، 150، كرتونة.إلى أن تمكّن من شحن لوري بمفرده 250-300 كرتونة. تطور الرجل حتى إشترى أحد اللواري الذي كان يعمل به عتالي. وأشترى لوري ثاني جديد من عرقه وتعبه. متّعه الله بالصحة والعافية. نواصل إن شاء الله..
كباشي الصافي

*** شكراً أخي كباشي بوست ممتع ...***

بوست بالجد رائع ....

صدقوني تابعته من الصفحة الأولي وحتي الصفحة رقم 3 الأخيرة .....ويالها من زكريات جميلة وزمن جميل ...

وياليته يعود ..... محبتي

شكرا يا شاويش عندنا رحله خريفيه بالترتر رايعه 000قريبا

عامٌ مضى من عمْرِنا في غفْلةٍ *** فَتَنَبَّهوا فالعمرُ ظلُّ سَحابِ

وتَهيّؤوا لِتَصَبُّرٍ ومشقَّةٍ *** فأجورُ من صَبَروا بغير حسابِ

اللهُ يَجزي الصائمينَ لأنهم *** مِنْ أَجلِهِ سَخِروا بكلِّ صعابِ

لا يَدخلُ الريَّانَ إلا صائمٌ *** أَكْرِمْ ببابِ الصْومِ في الأبوابِ

وَوَقاهم المَولى بحرِّ نَهارِهم ***ريحَ السَّمومِ وشرَّ كلِّ عذابِ

وسُقوا رحيقَ السَّلْسبيلِ مزاجُهُ *** مِنْ زنجبيلٍ فاقَ كلَّ شَرابِ

هذا جزاءُ الصائمينَ لربِّهم *** سَعِدوا بخيرِ كرامةٍ وجَنابِ

الصومُ جُنَّةُ صائمٍ من مَأْثَمٍ ***يَنْهى عن الفحشاء والأوشابِ

الصومُ تصفيدُ الغرائزِ جملةً *** وتحررٌ من رِبْقةٍ برقابِ

طبعاً هذا البوست إزدان بأقلام الإخوة الأعضاء أشكرهم جميعاً .................. وصراحة اندياح ماعادي
رسالة خاصــة الى رواد البوست ....... والمتواجدون بصورة أخص يعني أنا قاصدك يازعيم أحكي لينا " ســـــفرة في رمضان " ..... ورمضان كريم .............. عساك وصلت الحباك بين الأهل و الأحباب ...... بما إنو هناك رخص لكن الناس بتحاول تصـــوم ....................
حاج غريق أبدأ " سفرة رمضانية " ........ والرواد الباقين منتظرين بيهم عيد الأضحى و الشتا .................. انشاء الله في كل مناسبة سفرة في الذاكرة

بوست ممتع وشيق وهذه دعوة لاعادة احيائه من جديد... اصح ياغريق

تحياتي

ننتظرك يازعيم ..................